Lehen mailako finalerdietako lehen partidetan Matxin III.a eta Mitxeo eta Otxandorena eta Ion gailendu dira
Larunbat arratsaldean Caparrosoko Foruen pilotalekuan jokatutako jaialdiko lehen partidan, promozio mailako finalerdietako joaneko partidan Zorion Zelaieta oiztarrak eta Agirrezabalak 35-26 irabazi zieten Jon Sagaseta iruritarrari eta Baztani eta finalera sailkatzeko urrats handia eman zuten. Lehen mailako finalerdietako joanekoan, aldiz, aski estua izan zen eta Matxin III.ak eta David Mitxeo doneztebarrak 35-34 irabazi zieten Xanti Uterga doneztebarrari eta Barricarti. Finalerdi hauen itzulerakoak urriaren 24an jokatuko dituzte Etxarri Aranatzen.
Astelehenean, Atarrabiako Lorenzo Goikoa pilotalekuan jokatutako jaialdiko promozio mailako finalerdian, Mikel Mikelarena eta Xuban Ilarregi oiztarrek 35-32 irabazi zieten Koteto Ezkurra III.a doneztebarrari eta Markel Leatxe donamariarrari. Lehen mailako finalaurrekoan, berriz, Eloy Otxandorena doneztebarrak eta Ionek 35-30 irabazi zieten Zeberio II.ari eta Otanori. Finalerdi hauen itzulerakoak urriaren 16an jokatuko dituzte Altsasun.
