Euskal Jai Erremonte Fundazioak antolatutako Nafarroako Foru Komunitateko Erremonte Profesionaleko XXI. Txapelketako bigarren bikote finalista ezagutuko da igandean Zangozan, bigarren finalerdiko itzulerako partidaren ondotik. Xanti Uterga doneztebarra eta Agirrezabala, Jon Sagaseta iruritarraren eta David Mitxeo doneztebarraren kontra ariko dira. Utergak eta Agirrezabalak nahiko bideratua dute kanporaketa, joanekoan 35-23 irabazi baitzuten eta Sagasetak eta Mitxeok, kasik miraria behar dute egoera iraultzeko. Baina beti erraten dena: pilota borobila da eta inoiz ezin jakin nora aterako den. Irabazleek, Otxandorena eta Otano izanen dituzte esperoan finalean.
Zangozako Cantolagua pilotalekuan igandean 17:00etan hasiko den jaialdiko lehen partidan, Koteto Ezkurra III.a doneztebarra eta Otano, Zorion Zelaieta oiztarraren eta Ionen kontra ariko dira.
Jaialdiko sarreran biltzen denak osorik ANECS elkartera (Zangoza aldeko haur gaixoen elkartea) bideratuko da. 22 urtez goitiko ikusleek hmar euro ordaindu beharko dute, 16-22 urtekoek hamar euro eta gazteagoak doan sartuko dira.