Amaia Aldai atzelari ariko dela eta, lesioa larri eta luzearen ondotik, Leire Garairen itzulera dira aurtengo berrikuntzak
Elite mailari dagokionean, Hiru Hiriburuak txapelketa bi berritasun nagusirekin dator. Hasteko, Amaia Aldaik atzelari jokatuko du, Irati Benitorekin bikote eginez. Oraindik pozgarriagoa da bigarren berrikuntza, Hiru Hiriburuak txapelketa honek Leire Garai berriz ere kantxetan ikusteko aukera emanen baitu. Belauneko lesio larri baten erruz, aurrelari gasteiztarrak bi urte eman ditu zuriz jantzi ezinik eta berragerpeneko lehiaketa izanen da honakoa, non eta horrenbeste ordu eman dituen Mendizorrotzako pilotalekuetan. Itzulera honetan, berme osoko bizkartzain bat izango du arabarrak, Itsaso Erasun.
Denera elite mailan, zortzi bikote lehiatuko dira; Benito-Aldai, Salsamendi-Bertiz, Ibarrola-Oses, Garai-Erasun, Zabaleta-Mendizabal, Etxegarai-Capellan, Arrizabalaga-Zabala eta Sagardui-Bergara, printzipioz, irekia aurreikusten den lehiaketan.
Final laurdenak igande honetan
Irailaren 20an, igandean 16:00etan hasiko dira final laurdenak Gasteizen. Adar batean, Ibarrola eta Oses, Garairen eta Erasunen kontra eta Salsamendi eta Nahia Bertiz sunbildarra, Benitoren eta Aldairen kontra ariko dira. Irabazleek elkarren kontra jokatuko dituzte finalerdiak urriaren 4an. Bertze adarreko final laurdenetan, berriz, Arrizabalaga eta Zabala, Alize Sagardui goizuetarraren eta Bergararen kontra ariko dira eta Goiuri Zabaleta leitzarra eta Mendizabal, Etxegarairen eta Capellanen kontra. Irabazleek elkarren kontra jokatuko dute urriaren 4ko finalerdietan Donostiako Atano III.ean.