Duela bi urte hasi zituen Baztango Osasun Plataformak hilabeteroko elkarretaratzeak, «osasun arreta publiko eta duina eskatuz eskualdeko jende guziarendako». Modu berean, «denbora luzez pediatria zerbitzua modu prekarioan izan dugu eskualdean, eta eman diguten iragarpenaren arabera, irailaren 21etik aitzinera pediatrarik gabe geldituko gara Baztan, Urdazubi eta Zugarramurdin».
Plataformak adierazi duenez, «ezin dugu onartu ehunka haur behar den osasun arretarik gabe gelditzea, ehunka ama-aita kezkaturik egotea beren umeek mediku arretaz behartzen badira. Hau ez da arazo puntual bat, arazo estrukturala da. Urte aunitzez murrizketak egin dira osasun zerbitzu publikoan, plangintza kaskarrak egin izan dira, eta baliabideak ere eskasak. Horren ondorioa da orain pairatzen ari garena».
Hori dela eta, «eskualdean pediatria zerbitzua denbora guzian bermatuta egotea» eskatu dute, «eta horretarako hainbat eragilerekin harremanetan egonen gara. Ez dugu onartzen Baztan, Urdazubi eta Zugarramurdin pediatrarik gabe gelditzea egun bat ere, eta ez gara esperoan egoten ahal ea zer pasatuko den irailaren 21ean».
Batzar irekia
Joan den ikasturte akabailan jakinarazi zuten bezala, Baztango Osasun Plataformak bilera irekia eginen du irailaren 16an, asteazkena, 19:00etan Arizkunenean. Bertan «orain arte egindakoaz hausnartu, plataforma indartu eta egin beharrekoa diseinatu» nahi dute, eta herritar guziak animatu dituzte parte hartzera.