Luken Urtxegi igantziarra bigarren izan zen gizonezkoetan eta Sarako Oihana Berasategi hirugarren emakumeen artean
Gizonezkoetan, lehen saratarra Pantxo Saint Martin izan zen, laugarren sailkapen orokorrean (41.51) eta David Nesprias bigarren saratarra (hamabigarren sailkapen orokorrean, 44.24).
Parte hartzaileek 8,4 kilometroko ibilbidea osatu behar izan zuten. Sarako plazan hasi eta Zazpi Fagoko tontorra igo zuten, berriz ere Sarako plazara ailegatzeko. Lasterketaren berezitasuna da korrikalariak galtza luze beltzekin eta tixerta edo atorra xuriarekin janzten direla. Lehen 1.500 metroetan, gizonek 8 kiloko eta emakumeek 4 kiloko zakua bizkarrean harturi. Berako bidegurutzean zakua utzi, eta itzulerako bidean berriz hartzen dute.
Igandean izugarri aro ederra izan zuten arratsalde apala arte. Suharriagako parkean ekoizleen merkatua izan zen egun osoan, baita zikiroa ogi tartean jateko aukera ere, Olhain Ikastolak antolatua. Jendea ibili zitzaien eta kontent ziren. Arratsalde apalean, haur ttikien lasterketan euritsu izan zen, baina helduek ateri izan zuten ia ibilbide osoan.
