Nafarroako XLVI. Laxoa Txapelketako finala jokatu zuten Oiz B eta Doneztebe Titi taldeek larunbat arratsaldean Oizko plazan. Herriei dagokienez, joan den urteko finalista berak ziren, baina bi taldeak ezberdinak ziren eta zortzi finalista gazteetatik bakar bat ere ez zen finalean aritua aurten arte. Azkenean, espero baino emozio guttiago izan zen eta Doneztebe Titi taldeak (David Mitxeo, Koteto Ezkurra, Eloi Garcia eta Daniel Pio Garcia) 9-3 irabazi zion Oiz B taldeari (Xuban Ilarregi, Mikel Mikelarena, Markel Leatxe eta Zorion Zelaieta).
Larunbat goizean, hirugarren posturako partida jokatu zuten eta joan den urtean txapeldunorde izan zen Oiz A taldeak (Ioritz Zelaieta, Iker Bereau, Jon Oiartzabal eta Ugutz Zelaieta) 9-5 irabazi zion Arraioz Zubiondoa-Indakoa taldeari (Mikel Mindegia, Oskitz Karrikaburu, Urki Etxandi eta Aritz Alundaren ordez aritu zen Migue Maritorena).
Sari banaketan izan ziren Andrea Lusarreta, Nafarroako Pilota Federazioko presidentea; Gorka Urtasun, Baztango Udaleko zinegotzia, Rakel Ariztegi Oizko alkatea eta Euskadiko Kutxako Leire Eritze.
Laxoaren egun handia
Aipatzekoa da txapelketa borobiltzeko bi partidez gain, egitarau zabala izan zutela egun osoan, laxoaren besta egun handi honetan. Donamariako Bentan bazkaria izan zuten eta bazkalondoan, Oizko plazan bertan, bisita gidatua eskaini zuen Laxoa Elkarteak, laxoa ezagutzera emateko eta historia eta arauak azaltzeko lehenik, eta partidan zehar, jokoaren inguruko azalpenak ere eman zizkieten apuntatu ziren 51 lagunei. Lehen aldiz finala zuzenean eman zuten Youtuben. Sari banaketaren ondotik, plazan bertan afari-merienda eta DJ Endararen eskutik musika izan zuten.