Oiz B eta Doneztebe Titi aurrez aurre izanen dira larunbatean 17:30ean hasiko den partida nagusian eta goizean hirugarren posturako lehia jokatuko dute Oiz A eta Arraioz Zubiondoa Indakoa taldeek
Oiz B taldean Xuban Ilarregi, Mikel Mikelarena, Markel Leatxe eta Zorion Zelaieta ariko dira eta Doneztebe Titi taldean, berriz, David Mitxeo, Koteto Ezkurra, Eloi Garcia eta Daniel Garcia.
Laxoaren besta egunik handiena
Larunbat arratsaldean jokatuko den final nagusi horren aitzinetik, larunbat goizean, 11:00etan hirugarren posturako lehia jokatuko dute Oiz A (Ioritz Zelaieta, Iker Bereau, Jon Oiartzabal eta Ugutz Zelaieta) eta Arraioz Zubiondoa Indakoa (Mikel Mindegia, Oskitz Karrikaburu, Urki Etxandi eta Aritz Alunda) taldeek. Gero, 13:30ean, bazkaria izanen dute Donamariako Bentan. Bazkalondoan, Oizko plazan bertan, 16:45ean, bisita gidatua eskainiko du Laxoa Elkarteak, laxoa ezagutzera emateko eta historia eta arauak azaltzeko. 17:30ean izanen da final nagusia. Lehen aldiz finala zuzenean emanen dute Youtuben. Sari banaketaren ondotik, plazan bertan afari-merienda eta DJ Endararen eskutik musika izanen dute, laxoaren egun handia borobiltzeko.