Izan ere, hizkuntza baten transmisioa, egunerokotasuna eta biziraupena bermatzeko funtsezko euskarria da kultura. Kulturak iruditeria kolektiboa eta identitate partekatua eraikitzen ditu, eta berebiziko eragina du belaunaldi berrien hizkuntza ohituretan, bereziki ahozkotasuna eta jariotasuna lantzeko orduan. Horregatik, udalak ardura handia du ekitaldiak programatzerakoan, eta horretan bidelagun izateko asmoz landu du UEMAk gida hau. Ekainean helarazi zuen UEMAko kide diren 120 udaletara, bertako udal arduradunek eta teknikariek kontuan har dezaten.
Euskaraz programatzeko gida ere bai
Kultur programaziorako hizkuntza irizpideak biltzen dituen gidak 14 orrialde ditu, eta testu soil gisa biltzen ditu irizpideak eta gainerakoak. Horren osagarri, berriz, beste dokumentu bat ere prestatu du UEMAk udalentzat: Euskaraz programatzeko gida. Bigarren horrek, testu soila baztertuta, hizkuntza irizpideak eta gainerakoak labur, zehatz eta modu ikusgarrian erakusten ditu.