Ormuzko itsasarteko krisia eta plan estrategikoa ere izan dituzte hizpide ortzegunean Iruñean egindako bileran
Aierdi kontseilariarekin batera izan dira Nekazaritza eta Abeltzaintzako zuzendari nagusia den Ignacio Gil eta Landa Garapeneko zuzendari nagusia den Ruben Goñi. Aierdik UAGN, EHNE eta UCANeko ordezkariak deitu ditu abeltzaintzak eta, zehatzago, nekazaritza estentsiboko ustiategiek, bizi duten egoera dela-eta, sektoreak dituen kezkak kontrastatzeko eta ezagutzeko.
Bero boladaren ondorioz larreak hagitz lehor daude, eta, beraz, zailtasunak daude estentsiboan ari diren ustiategientzat. Departamentuak eta nekazaritzako erakundeek erabaki dute lehendik ere zailtasunak dituen sektore batean egoera horrek izan dezakeen inpaktu ekonomikoaren jarraipena eta kuantifikazioa egitea, nahiz ekoerregimenak malgutzeko edo galeren gaineko laguntzak emateko neurriak aztertzea, Nafarroako Gobernuak horiek konpentsatzeko aktiba baititzake.
Irango krisia eta plan estrategikoa
Kontseilariak eta nekazaritza sektoreko ordezkariek bilera aprobetxatu dute Nafarroako Gobernua (INTIA sozietate publikoaren kalkulu teknikoen bidez) eta sektoreko erakundeak, Ekialde Ertaineko krisia dela eta, lehengaien prezioen eta hornidura arazoen (batez ere ongarriak eta erregaia) bilakaera eta gorabeheren inguruan egiten ari diren segimendua errepasatzeko.
Azkenik, nekazaritzako erakundeek eta Landa Garapeneko Departamentuko taldeek Nafarroako lehen sektorerako Plan Estrategikoa egiteko Nafarroako Gobernuaren eta sektoreko eragile guztien artean burutuko dituzten lehen urratsak aztertu dituzte. Plana idazteko lanak esleitu berri dituzte, eta parte hartzeko lehen saioak abuztuaren bukaera aldera egiten hasiko dira.