Promozio eta lehen mailan ariko dira E•Remonte Iruña enpresako hamasei erremontista
San Fermin Txapelketako jaialdi guztiak 17:30ean hasiko dira Labriten. Uztailaren 8an lehen finalerdiak jokatuko dituzte. Promozio mailan, Mikel Mikelarena eta Xuban Ilarregi oiztarrak, Zorion Zelaieta oiztarraren eta Markel Leatxe donamariarraren kontra ariko dira eta lehen mailan, Zeberio II.a eta Otano, Eloi Otxandorena eta David Mitxeo doneztebarren kontra. Uztailaren 9an jokatuko dituzte bigarren finalerdiak. Promozio mailan, Oses eta Agirrezabala, Jon Sagaseta iruritarraren eta Baztanen kontra eta lehen mailan, Xanti Uterga doneztebarra eta Barricart, Matxin III.aren eta Ionen kontra.
Finalerdietako irabazleek jokatuko dituzte bi finalak uztailaren 10ean.
Euskal Jai Erremonte Fundazioak antolatzen dituen jaialdi gehienak bezala, hauek ere ADANO elkartearen aldekoak izanen dira. 22 urtez goitikoek hamar euroko sarrera-dohaintza egin beharko dute eta 16 eta 22 urte artekoek bortz eurokoa. Txapelketako hiru jaialdietarako abonua ere eskura daiteke, hogei eurotan 22 urtez goitikoek eta hamar eurotan 16 eta 22 urte artekoek.