Establezimendu turistikoek erregistro ofizialean nahitaez inskribatuak egon behar dutela ohartarazi du Nafarroako Gobernuak

Ttipi-Ttapa 2026ko ekainaren 29a

Elizondoko ikuspegia, Muniarteko zubitik hartua.

2025ean, Turismo Departamentuko erregistroan sartu gabeko 71 establezimendu harrapatu zituzten, eta bakoitzari 5.000 euro inguruko isunak izapidetu zizkieten.
Salaketa postontzi anonimo bat ere paratu dute martxan, herritarrek aukera izan dezaten etxebizitza klandestinoak daudela jakinarazteko.
Nafarroaren isurialde atlantikoan 5.879 lotoki daude erregistratuak, 499 establezimenduren artean. Ikusi artikuluan herri bakoitzeko datuak.

Kanpainan erabiliko dituzten irudiak

Nafarroako Turismo Erregistroan inskribatzea nahitaezkoa da

Kanpainaren helburua «ostatu turistikoen eskaintzan dagoen intrusismoaren aurka sentsibilizatzea, kontzientziatzea eta borrokatzea eta ezkutuko turismo jarduera murriztea» dela azpimarratu dute, eta, horretarako, informazioa emanez eta zabalduz hasi dute kanpaina, «sektorearentzat eta herritarrentzat» interesekoa den informazioa zabalduz, alegia.

Turismo Sailak gogorarazi du 2026an Nafarroako Turismoaren erregistro zenbakirik gabe aritzeak 9.000 eurorainoko zigor ekonomikoa ekar dezakeela

Joan den urtearekin konparatuz gero, zigorrak nabarmen handitu dituzte, 5.000 eurotik 9.000 euroraino. Izan ere, 2025ean, 2025ean, salatuak izan ziren 71 apartamentuetatik 37 herritarrek salaketa postontziaren bitartez emandako abisuengatik harrapatu zituzten. Horiek guztiei espedienteak ireki zitzaizkien, eta, azkenean, 41ek 5.000 euro inguruko zigorrak hartu dituzte.

2025eko ikuskapenen balantzea

Turismoko Zuzendaritza Nagusiak 600 ikuskapen baino gehiago egin zituen 2025ean. Horietatik 299 jarduera hasiera bazutela egiaztatzeko egin zituen; 144 jarduera aldatzeko; 69 jarduera uzteagatik eta 116 turismo araudia betetzen zutela baieztatzeko. Horiez gain, 71 ikuskapen turismo jarduerak eta zerbitzuak ezabatzeko egin zituzten. Eta, azkenik, turismo araudira egokitzeko 73 txosten egin zituzten, sustatzaileek, tokiko erakundeek, Gobernuko beste sail batzuek edo tokiko ekintza taldeek eskatuak. Gainera, turismo araudiari buruzko 172 kontsulta jaso zituen Turismoko Zuzendaritza Nagusiak.

Ikuskaritzak: 71tik 37 (% 52) herritarrek eskatuta

Jarduera klandestinoa ezabatzeko 71 ikuskaritzetatik 37 (% 52) herritarrek eskatuta hasi zituen Turismoko Zuzendaritza Nagusiak, eta 34 (% 48) zuzendaritza nagusiaren ekimenez. Inspekzioen ondorioz, 41 zigor espediente ireki zituzten, 40 ezkutuko lotokienak eta bat bidaia agentzien bermeak ez betetzeagatik; horietatik 32 zigor ekonomikoekin itxita dituzte dagoeneko (espediente bakoitza 5.000 euro arteko isunekin, batez bertze. Gainerako espedienteak izapidetzen ari dira oraindik.

Turismo ostatu irregular gehienak Iruñean

Turismoko Zuzendaritza Nagusiak azpimarratu duenez, «Ikuskapen Planak, zigorra ez ezik, turismo eredu orekatu baten babesa ere» bilatzen du. Legez kanpoko eskaintza ezabatzean, «bisitariek zerbitzu seguruak eta profesionalak jasoko dituztela ziurtatzen du Administrazioak, eta, aldi berean, kontrolik gabeko turismoak etxebizitzaren prezioan eta egoiliarren atsedenean dituen ondorio negatiboak arintzen ditu».

Salaketa postontzira sartzeko, Turismo Zuzendaritza Nagusiaren egoitza elektronikora jo behar da.

Hau idazterakoan, Baztan-Bidasoa deitzen duten eremuan 473 establezimendu turistiko zeuden erregistratuak, eta Leitzaldea-Urumealdean 26 (Plazaola).

Nafarroaren isurialde atlantikoan 5.879 lotoki daude erregistratuak, 499 establezimenduren artean

TTIPI-TTAPA/ERRAN.EUSek Nafarroa Garaian hartzen duen eremuan 499 establezimendu ageri dira Nafarroako Gobernuak duen Turismo Ostatuen Zerrenda Ofizialean, modalitate guztien artean (aterpetxeak, hotelak, ostatuak, landetxeak, apartamentuak…). Eta, denen artean, 5.879 loleku eskaintzen dituzte.

Ikusi segidan dagoen taula honetan herri bakoitzeko datuak:

Ekonomia

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun