Beratik Elizondorako tartea egin du Asorna Transpirenaika ibilaldiak

Ttipi-Ttapa 2026ko ekainaren 3a

Asorna Transpirenaiko ibiltariak Elizondora ailegatutakoan, Muniarteko zubian.

Nafarroako Gorren Elkarteak (Asorna) antolatuta, Transpirenaika Asorna/Ayuda In ibilbidea osatzen ari dira zortzi lagun (Asornako hiru, Ayuda In taldeko hiru eta bi laguntzaile), Hondarribia eta Izaba arteko 157 kilometro GR11tik, maiatzaren 31tik ekainaren 7ra. Ekainaren 14an ospatzen da Zeinu Hizkuntzen Nazioarteko Eguna eta, hain zuzen, zeinuen hizkuntzari ikusgarritasuna emateko helburua dute ibilaldi honen bitartez.

Zeinuen hizkuntzari ikusgarritasuna emateko helburua du Hondarribia-Izaba arteko 157 kilometroko ibilaldiak

Maiatzaren 31n Hondarribiko Higer itsasargitik Irunerako bidea egin zuten eta bertan egin zuten irteera ekitaldia. Ekainaren 1ean, astelehenean, Irun eta Bera arteko bidea egin zuten; ekainaren 2an, asteartean, Beratik Elizondoraino joan dira.

Ibiltariak Beratik abiatzen astearte goizean, Elizondorako bidean.

Ekainaren 3an, asteazkenean, Elizondotik Urkiagako gainera joanen dira, ekainaren 4an Urkiagatik Auritzera, ekainaren 5ean Auritzetik Aezkoara, ekainaren 6an Aezkoatik Otsagabira eta ekainaren 7an Otsagabitik Izabara.

Gizartea Baztan Bortziriak Elizondo Bera

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun