Txapelketa txikian Baztan, Bera, Doneztebe, Goizueta, Leitza eta Lesaka izanen dira eskualdeko ordezkariak eta txapelketa handian Leitza bakarrik
Herriarteko txapelketa handian zortzi herri lehiatuko dira, bi multzotan banatuak. A multzoko buru izanen den Leitza da eskualdeko ordezkari bakarra. Multzo berean izanen ditu Ultzama, Larraun eta Barañain. B multzoko buru Lizarra izanen da eta Esteribar, Betelu eta Tafalla ere ariko dira.
Herriarteko txikiari dagokionez, hiru multzotan banatutako hemezortzi herri ariko dira. A multzoan Bera izanen da multzo buru eta Barañain, Altsasu, Leitza, Agoitz eta Atarrabia ere ariko dira. B multzoan Ultzama izanen da buru eta Esteribar, Arbizu, Baztan, Doneztebe eta Lesaka ere ariko dira. C multzoan, azkenik, Goizueta izanen da multzo buru eta Betelu, Oltza, Irurtzun, Larraun eta Lizarrarekin batera ariko da.
Andrea Lusarreta, Nafarroako Pilota Federazioko presidenteak aurkezpenean aipatu zuenez, «herriarteko pilota txapelketak ttikienei aukera ematen die pilotan jokatzeko eta belaunaldi berriei segida emateko baliagarria da. Konpetizioaz gain, herriz herri parte hartzea eta gure kirolaren nortasuna sustatzeko garrantzitsua da».