Kezka horrek Benta Beltza inguruko larreetan bi ikastolak batzera ekarri ditu igande honetan, «hain justu ere bertan aziendak ibiltzen direlako, pentsatu ere egin gabe batean edo bertzean dabiltzan, Saran edo Beran, Beran edo Saran». Beraz, horrelatsu elkartu dira beratarrak eta saratarrak, bi ikastoletako haurrak. «gure harremanez pentsatzeko, eta hari batzuk berriz josten saiatzeko. Izan ere, hizkuntza bera darabilgu, bakoitzak gure maneran, eta auzo herriak izanagatik herri bat osatzen dugu gure artean».
Beraz, tragoren bat hartuz, eta elkarrekin solastatuz, elkar ezagutuz, elkarrekin jostatuz, «ea lortzen dugun berriro lehengo ildoari heltzea, eta Sara eta Bera, Olhain eta Labiaga, eta beratarrak eta saratarrak, elkarrengandik hurbiltzea».
Maiatzaren 3an egindako ekintza hau hasiera bertzerik ez dela jakinarazi dute, «haria ez dadin eten, elkarlanean eta auzolanean segituko dugu urratsez urrats, oraina eta etorkizuna euskaraz josten. Ilusioz Euskal Herria eraikitzen jarraituko dugu».