35-30 irabazi zieten larunbatean Aranabian Zeberio II.ari eta Mitxeori
Hasieran gorriek agindu zuten eta sei tantoko aldea ere izan zuten Zeberiok eta Mitxeok (10-4 eta 11-5), baina hamaikana, hamabina, hamalauna, hamazazpina eta hogeita bana berdindu ondotik, bortz tantoko aldea hartu zuten urdinek lehen aldiz (21-26). Hamar tantoko aldea ere izan zuten Otxandorenak eta Barricartek (22-32). Bazirudien partida erraz irabaziko zutela, baina 8-0eko partzialarekin bi tantora hurbildu ziren Zeberio eta Mitxeo (30-32). Azken hiru tantoak, ordea, urdinek egin zituzten, garaipen garrantzitsua lortzeko (30-35).
Otxandorena bikain aritu zen eta hogei tanto egin zituen, bi pilota bakarrik galduz. Gorriak lehen partidan baino hobekiago aritu ziren, Mitxeok 11 tanto egin zituen eta Zeberiok 14, baina ez zen aski izan garaipena lortzeko.
Jaialdia hasteko jokatuko den partidan, herriko semeak, Jon Sagaseta iruritarrak eta Agirrezabalak 30-20 irabazi zieten Koteto Ezkurra III.a doneztebarrari eta Markel Leatxe donamariarrari.