Igandean Labriten jokatutako final estuan 22-10 irabazi zieten Ruiz de Infanteri eta Erasuni
Kirol arloan, Sagardui-Gamindek pronostikoak bete zituzten, ez dira alferrik egungo binakakoaren txapeldunak, baina lana erruz egin behar izan zuten oso lehiakor agertu ziren Ruiz de Infante-Erasunen aurka, final gorabeheratsu batean. Goizuetarra eta Laukizkoa finalaren zati handienean aurretik izan ziren markagailuan eta sendoago aritzeak eman zien garaipena, baina partida hasieran bezala amaieran, hortzak estutu behar izan zituzten partida handia jokatu zuten aurkarien aurrean. Otxandiokoa eta zizurkildarra ideiak oso argi zituztela atera ziren kantxara. Jokoa nahastu eta Gaminde deseroso egotea behar zuten txapela janzteko aukerak izan nahi bazituzten. Pilota beheko txapatik gertu ibilita, hala egin zuten partida hasieran, atzelari gorriari kosta egin zitzaion partidan sartzea eta, arriskuak hartuz, urdinak 4-0 aurreratu ziren. Ruiz de Infantek bizi ibili zuen pilota, Erasunek ere eutsi baino gehiago egin zion Gaminderi eta partida amestu bezala hasi zen urdinentzat.
Hala ere, Gaminde ez zegoen bere palmares izugarrian falta zuen torneoa irabazteko aukerari ihes egiten uztekotan, eta partidan sartzen joan zen heinean, finalaren gidoia erabat aldatu zen. Sagardui zuzen baten laguntzarekin, Laukizkoak finalaren aginte makila hartu zuen eta 14-1eko partzial batekin, 15-6 aurreratu ziren gorriak.
Baina urdinek lanean segitu zuten eta 16-12 hurbildu ziren lehenengo eta Enara Gaminderi presak sartzea ere lortu zuten 19-17 etorri zirenean. Laukizkoak txapara bota zituen pare bat pilota moztera joan zenean eta partida ikaragarri orekatu zen azken txanpan, pilotalekua bete zuten zaleen gozamenerako.
Pilatutako desabantaila, ordea, handiegia izan zen Ruiz de Infante eta Erasunentzat eta azkenerako amore eman behar izan zuten, hori bai, Sagardui-Gaminderi susto handi bat eta pilotazaleei gozatu oraindik handiago bat emanda.
Jaialdiko lehen partidan, Goiuri Zabaleta leitzarrak eta Nahia Bertiz sunbildarrak 18-16 irabazi zieten Salsamendiri eta Mendibururi.