Mendialdeko Azoka Ibiltariaren zazpigarren edizioa igandean hasiko da. Arriben eginen dute bost azoketatik lehena. Gainera, azken urteetan bezalaxe, azokak bestelako ekintzekin osatuko dituzte. Apirilaren 19an, Arriben, artzain usadioen bueltan osatu dute egitaraua. Azoka 11:ooetan hasiko da eta 11:30ean Mendialdeko eta Idiazabal Jatorri Izendapena duten gazten dastaketa egiteko aukera izanen da, Igor Hernandez Ochoa adituaren eskutik. Mendialdeko baserritarren gazta lehiaketa herrikoia ere antolatu dute. Azokako bisitariak izanen dira epaile eta hamabost bat gazta mota ezberdin dastatu ahal izanen dituzte bi euroren truke: ardi eta ahuntz gaztak, mota ezberdinetakoak, ondua, urdina, ketua... Bozketaren ondoren, 13:30ean eginen dute sari banaketa.
Tokiko hainbat produkturen erakusleiho dira azokak: «Mendialdeko ekoizle eta artisauen lana erakutsi eta merkaturatzea da helburua». Bisitariek elikagaiak: taloa, gazta, eztia, haragi-produktuak, hestebeteak, pateak, ogia, arrautzak, artisau garagardoa edo olioa... izanen dituzte aukera. Horiez gain, artisau eta eskulangileen lanak ere salgai jarriko dituzte: egurra, zeramika, metala edo ehunekin egindako lanak.