Ados Pilota elkartearen txapelketako finalak martxoaren 27an, ortzirale arratsean, jokatu zituzten Azpeitiko Izarraitz pilotalekuan, 600 ikusleren aitzinean. Maila nagusiko finalean, Oskozek eta Arrastiak 22-13 irabazi zieten Iturriaga leitzarrari eta Orbegozori. Promozio mailakoan, berriz, Arrutik eta Dunixe Alberro iturendarrak 22-12 irabazi zieten Alize Sagardui goizuetarrari eta Etxeberriari.
Lehen mailako finalaren hasiera orekatua izan zen, alde handirik gabe, baina bigarren zatian urdinen mailak koska bat gora egin zuen eta neurketa haustea lortu zuten. Gorriak ez ziren gai izan txapelketan erakutsi duten maila bera emateko, eta urdinek, merezimendu osoz, txapela jantzi zuten.
Promozio mailako finalaren hasieran Sagardui-Etxeberriaren abiadura nagusitu bazen ere, Arruti-Alberro bikoteak ongi eutsi zion finalari eta bigarren zatian askoz ere sendotasun handiagoarekin jokatuz beste garaipen eder batekin borobildu zuten txapelketa.
