Azkenaldian egindako obrak eta esku artean dituen proiektuak aurkeztu zituen Saldiasko Herriko Etxeak otsailaren 27an egindako batzarrean. Besteak beste, eskolako eta Urrutiñako bidea egokitzeko obrak hartu zituzten hizpide udal ordezkariek, maiatzean egitekoa den Sagardo Pesta ere aipatu zuten, baita joan den urteko eta aurtengo pestak ere. Auzolanean lan batzuk egiteko asmoa ere badute.
Urrutiñako bidea
Urrutiñako bidea egokitzeko beharra badela ikusita, gaia lantzen hasi da Herriko Etxea, eta dirulaguntza erdietsi du Nafarroako Gobernuko 2026-2028ko Tokiko Inbertsioen Planaren Tokiko Programazioaren bitartez. Zehazki, 83.660.12 euroko gastua (BEZa kanpo) aurreikusi du Herriko Etxeak, eta gobernuak 62.745,09 euro bideratuko ditu. Herriak, beraz, BEZa eta diruz lagundu gabeko zatia hartu beharko ditu bere gain: 38.483,66 euro.
Eskolako obra
Otsontako eskola handitzeko lanen nondik norakoak ere esplikatu zituzten. Denetara, 147.379,04 euro gastatu ditu Herriko Etxeak eta Nafarroako Gobernuak 40.000 euro eman ditu.
Sagardo Pesta eta beste
Ospakizunerako tartea ere hartu nahi dute, eta, besteak beste, Sagardo Pesta ari dira antolatzen maiatzaren 2rako.
Bestalde, herriko pestetako kontuez ere mintzatu ziren, eta joan den urteko pestetako kontuen berri eman zuten. Guztira, 12.082,4 euro gastatu zituen udalak. Aurtengoei begira ere jarriak dira eta ekainaren 19tik 24ra izanen direla aurreratu dute.
Auzolana
Aurtengo lehenbiziko auzolana apiril aldera izanen dela iragarri dute, eta herriko ur depositua berritzeko lanetan hasiko direla.