Aitzineko astean Itsasun bezala, Olatz Arrizabalagak bere seigarren txapela nahi duela berretsi du igande honetan Lasarte-Orian, oso giro ederrean jokatu den jaialdian beste erakustaldi bat emanda (22-11). Binakako Txapelketa Nagusiko lehen fasea azken txanpan sartu den honetan ondoriorik atera ahal bada, hori txapela irabazteko faborito argienak gernikarrak eta Arrate Bergarak osatzen duten bikotea direla da. Bost partida jokatu eta bostak irabazi dituzte eta Goiuri Zabaleta leitzarra eta Nahia Bertiz sunbildarra (igandean Miriam Arrillagak ordezkatu behar izan zuen), aldiz, kinka larrian daude, beste hainbeste partidetan garaipen bakarra lortuta.
Igandeko jaialdian gazte mailako beste bi partida ere jokatu dira. Batean, Joana Iratzoki igantziarra aritu da. Maria Balerdirekin batera, 3-18 galdu zuen Amaiur Landaren eta Izaro Aizpuruaren kontra.
Binakako txapelketak jardunaldi bikoitza izango du hurrengo igandean, Bizkaiko Etxebarrin eta Gipuzkoako Asteasun. Gauzak gori-gori daude eta puntu bakoitzak gero eta garrantzi handiagoa du.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.