Tiraldi guziak irabazi zituzten lesakarrek larunbatean jendez gainezka zegoen Lubineko pilotalekuan
Gizonezkoen 600 kilokoan bederatzi talde aritu ziren azkenean, bi multzotan banatuak. Multzo bakoitzeko hiru lehenbizikoek lortu zuten otsailaren 21ean Abadiñon jokatuko den finalerako txartela. A multzoan, Lesakako Beti Gaztek irabazi zituen tiraldi guztiak, Abadiño izan zen bigarren eta Zuraide B hirugarren. Finaletik kanpo, laugarren, Ñapurrak B gelditu zen. B multzoan, berriz, Ñapurrak A nagusitu zen, Ibarra bigarren eta Txantrea hirugarren. Finaletik kanpo gelditu ziren Zuraide A laugarren eta Antsoain bosgarren.
Emakumeen 500 kilokoan ere zazpi talde aritu ziren. Hauek ligaxka moduan ari dira eta Beti Gaztek irabazi zituen tiraldi guztiak. Bigarren postuan berdinduak gelditu ziren Ibarra eta Txantrea; laugarren postua Abadiñok lortu zuen, bosgarrena Berriozarrek, seigarrena Badaiotzek eta zazpigarrena Antsoainek.
Azken bi jardunalditan hiru txapel banatuko dira
Goizuetako jardunaldiaren ondotik, aipatu bezala, otsailaren 21ean Abadiñon jokatuko dute gizonezkoen 600 kiloko finala eta emakumeen 500 kiloko bigarren jardunaldia. Otsailaren 28an Txantrean jokatuko den azken jardunaldian jokatuko da emakumeen 500 kiloko finala eta gizonezkoen 560 kiloko txapelketa, jardunaldi bakarrean.
Beti Gaztek, orain arte, aurten lortu dituen lau txapelekin, historikoki dagoeneko Euskal Herriko txapelketa nagusiko 48 txapel jantziak ditu. Lehena duela 30 urte, 1996an jantzi zuen. Beraz, oraindik banatzeko falta diren hiruetatik bi lortuko balitu, Euskal Herriko 50 txapelera ailegatuko litzateke Lesakako taldea. Zenbaki borobila.