Goizuetak hartuko du Euskal Herriko sokatira txapelketako jardunaldia larunbatean

Ttipi-Ttapa 2026ko otsailaren 13a

Beti Gazteko emakumeak Lesakan jokatutako jardunaldian. 540 kiloko Euskal Herriko txapela irabazi zuten orduan eta orain, 500 kilokoaren lehian hasiko dira Goizuetan. Gizonezkoak 600 kilokoan lehiatuko dira.

Gizonezkoen 600 kiloko eta emakumeen 500 kiloko lehen jardunaldia izanen da

Dagoeneko lau txapel banatuak direla (laurak Lesakako Beti Gaztek lortu ditu), Euskal Herriko sokatira txapelketak larunbat honetan segida izanen du Goizuetan. Otsailaren 14an, gizonezkoen 600 kiloko eta emakumeen 500 kiloko lehen jardunaldia jokatuko dute Goizuetako Lubineko frontoian, larunbatean 17:00etan hasita, Goizuetako Kultur Taldeak, Goizuetako Udalaren eta Umore Ona elkartearen laguntzaz antolatutako saioan.

Gizonezkoen 600 kilokoan zazpi talde ariko dira: Beti Gazte, Ibarra, Zuraide, Ñapurrak, Abadiño Txantrea eta Antsoain. Emakumeen 500 kilokoan ere zazpi talde ariko dira: Beti Gazte, Badaiotz, Txantrea, Ibarra, Abadiño. Antsoain eta Berriozar.

Azken bi jardunalditan hiru txapel banatuko dira

Goizuetako jardunaldiaren ondotik, otsailaren 21ean Abadiñon jokatuko dute gizonezkoen 600 kiloko finala eta emakumeen 500 kiloko bigarren jardunaldia. Otsailaren 28an Txantrean jokatuko den azken jardunaldian jokatuko da emakumeen 500 kiloko finala eta gizonezkoen 560 kiloko txapelketa, jardunaldi bakarrean. 560 kiloko gizonezkoen txapelketan Beti Gazte, Ibarra, Zuraide, Ñapurrak, Abadiño eta Txantrea seguruak dira eta, beharbada, Antsoainek ere aurkeztuko du zortzikotea.

Kirola Bortziriak Leitzaldea Lesaka Goizueta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun