Zabaleta leitzarrak eta Bertiz sunbildarrak 14-22 galdu zuten Aldairen eta Arrillagaren kontra eta Sagardui goizuetarrak, Gaminderekin batera, 18-22 Ruiz de Infanteren eta Mendizabalen kontra
Lehen partidan Amaia Aldai nabarmendu behar da. Dimoztarrak sekulako partida jokatu zuen eta berak ezarritako erritmoarekin hautsi zen lehia. Arrillaga ere seguru aritu zen atzean eta arazo handiegirik gabe gainditu zuten Zabaletak eta Bertizek osatutako bikote gaztea (22-14).
Bigarren partida gogorragoa eta orekatua izan zen, azken txanpara bi tantoren aldearekin baino ez ziren sartu Ruiz de Infante eta Mendizabal (19-17), baina partida bukaeran Sagardui eta Gaminde ez ziren markagailuari buelta emateko gai izan, aurkariak gehiago izan zirelako (22-18).
Datorren asteburuan jardunaldi berezia jokatuko da, lehen aldiz Binakako Txapelketa Nagusiko jaialdi bat Ipar Euskal Herrian jokatuko da eta. Itsasun izanen da, bertako Xalbador kolegioaren alde.