Repsolek «Artikutza, Arano, Goizueta, Hernani, Lesaka eta Oiartzun inguruko mendiak txikituaz kapitala metatzen jarraitu nahi duela» salatu dute
Elkarretaratzean aipatu dutenez, «Repsolen praktika ekozida eta kolonialak salatzera etorri gara. Multinazional honek hamarkadak daramatza mundu osoan zehar bizitza suntsitzen. Ezagutzen dugun enpresa kutsakorrenetako bat izateaz gain, hegoaldeko zapaldutako herrietan txikizioak egiten jarraitzen du gaur egun ere, bertako herriak eta ingurune naturalak suntsituz».
Gainera, «hilabete honen hasieran denok ikusi dugu Josu Jon Imaz (Repsoleko kontseilari ordezkaria) Trumpen mesedetara lanean, azken honi eskerrak ematen Venezuelako hiriburua bonbardatu eta bertako presidentea bahitzeagatik, bertako ondasunak lapurtzen jarraitzeko», adierazi dute.
Urumeako Mendiak Bizirik eta Bianditz-Domiko Bizirik plataformek diotenez, «erregai fosilen negozioan sakontzen duen bitartean, multinazional bera da Artikutza, Arano, Goizueta, Hernani, Lesaka eta Oiartzun inguruko mendiak txikituaz kapitala metatzen jarraitu nahi duena, oraingoan 200 metroko altuerako haize errotez osatutako makro zentral eolikoak jarriz». Endesa multinazionalak ere beste proiektu bat ere badu inguru honetan eta bi plataformek argi daukate horrelakorik ez dutela onartuko: «Hau ez da guk egin nahi dugun ibilbidea, Repsol bezalako multinazionalen proiektuei irmoki ezetz esatea beharrezkoa da. Makroproiekturik ez hemen ez inon! Mendien industrializazioa gelditu! Repsol eta Endesa kanpora!».