12 udalerrik goiti egin dute
2000. urtetik honat, eskualdean dauden 27 udalerrietatik hamabitan biztanleriak goiti egin du eta bertze hamabortzetan beheiti. Bereziki Senpereko (% 62,62), Doneztebeko (% 36,28), Sarako (% 24,03), Iturengo (% 15,32) eta Donamariako (% 14,99) hazkundea dago horren gibelean. Eta neurri ttikiagoan, Berak (% 9,37), Bertizaranak (% 3,35), Baztanek (% 3,15), Leitzak (% 2,93), Elgorriagak (% 1,94), Etxalarrek (% 1,77) eta Lesakak (% 1,27) ere goiti egin dute.
15 udalerrik beheiti
Gainerako udalerrietan beheiti egin du 2000. urteaz geroztik, eta batzuetan, hagitz nabarmen gainera: Ezkurran (% 46,12), Aranon (% 28,48), Goizuetan (% 24,47), Beintza-Labaienen (% 21,03), Saldiasen (% 17,22), Urrozen (% 15,87), Eratsunen (% 14,44), Areson (% 11,26) eta Oizen (% 10,42). Apalxeago bada ere, herri hauetan ere biztanleriak puntu batzuk beheiti egin du: Zubietan (% 5,54), Urdazubin (% 5,10), Zugarramurdin (% 4,70), Arantzan (% 4,27), Igantzin (% 1,70) eta Sunbillan (% 0,44).
Despopulazio arriskuan dauden udalerriak
Nafarroako Gobernuak duela sei urte argitaratu zuen, Nafarroako udalerrien despopulatzeari buruzko ikerketa. 1989tik 2019rako datuak kontuan hartu zituen, eta Goizueta, Ezkurra, Eratsun eta Beintza-Labaien «despopulatzeko muturreko arriskuan» zeudela ondorioztatu zuen; «despopulatzeko arrisku nabarmena» Aranok zuela erran zuen eta «despopulatzeko arrisku handiarekin» eskualdeko bertze bederatzi udalerri izendatu zituen: Arantza, Areso, Baztan, Bertizarana, Etxalar, Oiz, Urroz, Saldias eta Zubieta.
Herri handienetan pilatua
Bada bertze datu adierazgarri bat. 27 herrietatik zazpi dira 1.500 biztanle baino gehiago dituztenak: Senpere (7.170), Bera (3.817), Elizondo (3.556), Leitza (3.025), Sara (2.720), Lesaka (2.715) eta Doneztebe (1.852). Horietan 24.855 lagun bizi dira, hau da, eskualdeko biztanleria osoaren ia hamarretik zazpi (% 67,95).