Nafarroako Kirol Jokoetako eskuz banakako txapeldun izan dira Erik Igoa etxalartarra eta Oihan Irurieta lesakarra

Ttipi-Ttapa 2025eko abenduaren 22a

Juel Igoa (benjaminetan txapeldunorde), Erik Igoa (infantiletan txapeldun), Iraitz Andiarena (infantiletan txapeldunorde) eta Oihan Irurieta (benjaminetan txapeldun), sari banaketaren ondotik. Argazkia: Maider Ansalas

Nafarroako Kirol Jokoetan eskuz banakako pilota txapelketako finalak jokatu zituzten abenduaren 20an, larunbat goizean Barañaingo Retegi pilotalekuan. Lau kategorietako finaletan baziren eskualdeko pilotariak eta infantil mailan Bortziriak taldeko Erik Igoa etxalartarra eta benjamin mailan, Arkupeko Oihan Irurieta lesakarra txapeldun suertatu dira. Txapeldunorde izan dira, aldiz, Aurrerako Aiur Ugartemendia kadete mailan, Aurrerako Iraitz Andiarena infantil mailan, Txarutako Oihan Etxenike alebin mailan eta Bortziriak elkarteko Juel Igoa benjamin mailan.

Larunbatean Barañainen jokatutako lau finaletan eskualdeko bertze hainbat pilotari lehiatu ziren

Handienaz aitzinera, lehen mailako kadeteen finalean, Beti Onak taldeko Rekaldek 18-7 irabazi zion Aurrerako Aiur Ugartemendia leitzarrari.

Lehen mailako infantilen finaleko bi finalistak eskualdekoak ziren. Bortziriak taldeko Erik Igoa etxalartarrak 18-10 irabazi zion Aurrerako Iraitz Andiarena leitzarrari.

Lehen mailako alebinen finalean, Ultzamako Alsuak 18-6 irabazi zion Txarutako Oihan Etxenike iruritarrari.

Lehen mailako benjaminen finalean, azkenik, bi finalistak eskualdekoak ziren eta, kasu honetan, bi joko irabaztera lehiatu ziren. Lehen jokoan, Bortziriak taldeko Juel Igoa etxalartarrak (infantil mailan txapeldun suertatu zen Erik Igoaren anaia ttikia) 9-7 irabazi zion Arkupeko Oihan Irurieta lesakarrari; bigarrenean, aldiz, 8-9 irabazi zuen Irurietak eta kitarakoan, berriz ere 0-3 irabazi zuen Irurietak. Hortaz, Arkupeko Irurieta suertatu zen txapeldun ((1-2).

Kirola Baztan Bortziriak Leitzaldea Irurita Etxalar Lesaka Leitza

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun