200 entzule parean zituztela egin zuten larunbatean Muskildiko saioa. Sei bertsolari izan ziren oholtzan: Bittor Thicoïpe, Elixabet Etxandi, Haira Aizpurua, Miren Artetxe, Mizel Mateo eta Oier Urreizti.
Lan puntuagarriak eginda. Miren Artetxe hendaiarrak bildu zituen puntu gehien eta beraz, baita, hurrengo fasean kantatzeko txartela ere. Honela gelditu zen sailkapena:
- Miren Artetxe Sarasola 425,5 puntu.
- Elixabet Etxandi Goienetxe 397,5 puntu.
- Haira Aizpurua Ibargarai 393 puntu.
- Mizel Mateo Sallaberry 380 puntu.
- Oier Urreizti Lafitte 364 puntu.
- Bittor Thicoïpe Leizagoien 359.5 puntu.
Heldu den larunbatean eginen dute fase honetako azken saioa Hiriburun.
Txapelketaren azken txanpa
Fase hau bukatu, eta saio bakoitzeko irabazlea eta puntuazio altuena duten bederatzi bertsolariak sailkatuko dira final aitzinekoetara. Eskualdeko bertsolariei dagokionez, Maddi Ane Txoperenak lortua du txartela hurrengo faserako. Haira Aizpuruak, Karlos Aizpuruak eta Josu Txoperenak berriz, larunbatera arte itxaron beharko dute sailkatu diren ala ez jakiteko.
Final aitzinekoak Baigorrin urtarrilaren 10ean eta Bardozen 17an eginen dituzte, eta finala, berriz, urtarrilaren 31n Donibane Lohizuneko Jai Alain.