Guillermo Mazo zenaren omenez 28. aldiz antolatutako lau eta erdiaren barreneko pilota txapelketaren finalak jokatu zituzten abenduaren 3an Lekunberrin. Jubenil mailako finalean, Ultzamako Pablo Aldazek 18-10 irabazi zion Aurrerako Julen Baleztena leitzarrari.
Lehenbiziko zortzi tantoak segidan egin zituen iaz kadete mailako txapeldun izan zen Aldazek eta alde horri eutsi zion partidan, nahiz eta erdi aldera, bost tantora hurbildu zen Baleztena (10-5). Alderik handiena hamar tantokoa izan zuen Ultzamakoak (16-6).
Hirugarren posturako lehian, Larraungo Igor Nazabalek 18-5 irabazi zion Errekako Iker Anzizar doneztebarrari.
Kadete mailako finalean, Beti Onak elkarteko bi pilotari izan ziren aurrez aurre eta Eneko Rekaldek 18-16 irabazi zion Mikel Ezkurrari.