Beti Gaztek agintzen segitzen du Nafarroako sokatira txapelketan

Ttipi-Ttapa 2025eko azaroaren 17a

Beti Gazteko gizonezkoen zortzikotea tiran Antsoainen. Tiraldi guztiak irabazi zituen.

Azaroaren 8an Donezteben txapelketa mistoa irabazi ondotik, Nafarroako gizonezkoen nahiz emakumezkoen sokatira txapelketan ere agintzen hasi da Lesakako Beti Gazte sokatira taldea. Gizonezkoak zortzinaka (620 kilo) eta emakumeak seinaka (390 kilo) hasi dira lehian eta Antsoainen igande goizean jokatutako lehenbiziko jardunaldiko tiraldi guztiak irabazi zituzten Beti Gazteko emakumeek nahiz gizonek.

Gizonezkoen eta emakumezkoen txapelketetako lehen jardunaldian tiraldi guztiak irabazi dituzte Antsoainen

Emakumezkoetan sei talde izanen dira, bi eskualdekoak. Beti Gaztek tiraldi guztiak irabazi zituen Antsoainen; Amaiurrek, aldiz, guztiak galdu zituen. Beti Gazteren ondotik, bigarren izan zen Txantrea, hirugarren Berriozar, laugarren Araxes, bosgarren Antsoain eta seigarren Amaiur.

Beti Gazteko emakumeen seikotea Antsoainen. Hauek ere tiraldi guztiak irabazi zituzten.

Gizonezkoetan, hiru talde bakarrik ari dira: Beti Gazte izan zen lehena Antsoainen, Berriozar bigarren eta Txantrea hirugarren.

Kategoria hauetako bigarren jardunaldia eta, ligaxkako lehen bi sailkatuen arteko finalak Lesakan, azaroaren 22an, larunbatean 17:00etan hasita, jokatuko dituzte. Beraz, Beti Gaztek etxean txapelak janzteko lehen urratsa eman dutela erran daiteke.

Kirola Baztan Bortziriak Amaiur Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun