Karrikaburu eta Iriarte nagusi Bortz Kirol txapelketako asteburuko jardunaldian

Ttipi-Ttapa 2025eko azaroaren 17a

Julen Iriarte narbartearra bortz modalitatetan nagusitu zitzaion Azkaingo Txema Gogorzari igande goizean Donezteben.

Doneztebeko Erreka elkarteak laugarren urtez antolatutako Bortz kirol txapelketako bi partida jokatu dituzte asteburuan Doneztebeko Ezkurra pilotalekuan. Azaroaren 15ean, larunbat arratsaldean, Azkaineko Xan Karrikaburu 51-45 nagusitu zitzaion Oiartzungo Andoni Zabalari. Aipatzekoa da gipuzkoarra bortz modalitatetatik hirutan gailendu zela (joko garbin 12-10, eskularruarekin 12-7 eta eskuz 12-10), baina lapurtarrak alde handiagoa lortu zuen irabazi zuen bi modalitatetan (xaren 12-5 eta paletaz 12-4). Azaroaren 16an, igande goizean, Julen Iriarte narbartearra nagusitasun osoz, 60-25 gailendu zitzaion Azkaingo Txema Gogorzari Modalitate guztietan irabazi zuen Iriartek (xaren 12-2, joko garbin 12-9, eskularruarekin 12-6, paletaz 12-4 eta eskuz 12-4).

Hirugarren jardunaldiko bi partida Azkainen

Duela lau edizio txapelketa honekin hasi zirenetik, Erreka elkarteak argi zuen iparralde eta hegoaldeko pilotari eta pilotazaleak biltzeko bidea ere izanen zela. Horren haritik hirugarren jardunaldiko bi partida Azkainen jokatuko dituzte azaroaren 22an, larunbat arratsaldez.

Azaroaren 22an, larunbatean 17:00etan hasita, David Albiasu narbartearra, Milafrangako Lionel Leparouxen kontra arilo da eta, segidan, azkaindarren arteko lehian ariko dira Xan Karrikaburu eta Txema Gogorza.

Kirola Bertizarana Malerreka Narbarte Doneztebe

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun