Nafarroako Euskal Pilota Federazioak antolatutako Nafarroako kluben arteko eskuz binakako pilota txapelketako finalak jokatu dituzte azaroaren 1ean Tafallako Ereta pilotalekuan. Ohorezko maila nagusian, Oberena elkarteko Oian Canabal igantziarrak eta Unax Apeztegia elizondorrak jantzi dute txapela, Sarasibar eta Balerdi taldekideei 22-13 irabazita.
Lehen mailako finalean, Zugarralde elkarteko Enaitz Ansó oronoztarrak eta Alduntzinek 11-22 galdu zuten Lagunak elkarteko Arribillagaren eta Oskozen kontra.
Bigarren mailako finalean, Leitzako Aurrerako Mikel Sagastibeltzak eta Eñaut Goikoetxeak 22-5 irabazi zieten Beti Onak elkarteko Mariezkurrenari eta Fernandezi.
Hirugarren mailako finalean, azkenik, Ultzamako Otxandorenak eta Landiribarrek 22-12 irabazi zieten Beti Onakeko Ibarrari eta Bidaurretari.