Azaroaren 1ean Luzaiden jokatutako final ikusgarrian 35-31 irabazi zieten Zeberio II.ari eta Mitxeori
Jaialdiko lehen partida ere maila handikoa izan zn eta Matxin III.ak eta Agirrezabalak 30-28 irabazi zieten Xuban Iturregi iruritarrari eta Ioni. Partiden aitzinetik, Luzaideko bolanteen emanaldia ere izan zuten ikusgai.
Final nagusia bikaina izan zen. Faboritoak, Otxandorena eta Otano agintzen hasi ziren eta bortz tantoko aldea lortu zuten 6-11koan. Gorriek, baina, Mitxeo indartsu baten kolpean oinarrituta zazpi tanto egin zituzten bata bertzearen ondotik eta 13-11 aitzinetik paratu ziren. Berdintasun handia izan zen partidaren erdialdean baina agudo urdinek lau tantoko (20-24) eta sei tantoko aldea ere lortu zuten (22-28). Bazirudien partida ongi bideratua zutela, baina tanto bakarrera hurbildu ziren Zeberio eta Mitxeo (27-28). Baina ez zuten partida berdintzea lortu eta Otxandorenak tanto ikusgarriak egin zituen, berriz ere sei tantoko aldea hartzeko (27-33). Bi tantora hurbildu ziren, berriz ere gorriak (31-33), baina azkenean, 31-35 irabazi zuten Otxandorenak eta Otanok.
Otxandorenak 21 tanto egin zituen finalean, Mitxeok bederatzi eta Zeberiok eta Otanok zortzina. Bi doneztebarrak izan ziren partidako onenak, bakoitza bere lekuan.