Aimar Otxoteko lesakarra bigarren izan da V. Betagarri Trail lasterketan

Ttipi-Ttapa 2025eko urriaren 28a

Betagarri Trail lasterketan irabazle suertatu zen Urko Herran erdian, hirugarren izan zen Ander Amezketa eta bigarren izan zen Aimar Otxoteko lesakarra alde banatara dituela.

Ancin Freeland kirol elkarteak antolatutako Betagarri Trail lasterketaren bosgarren edizioa egin zen larunbatean Antzinen. 24 kilometroko trail lasterketan Lea La Blanca taldeko Urko Herran arabarra nagusitu zen eta bigarren izan zen Aiaramendi taldeko Aimar Otxoteko lesakarra. 15 kilometroko Ikatz lasterketan, berriz, Osin Trail taldeko Hodei Lujanbio goizuetarra gailendu zen.

Antzinen bertan egin zen Ikatz lasterketa laburragoan Hodei Lujanbio goizuetarra nagusitu zen

24 kilometroko Betagarri Trail lasterketa irabazteko ordubete, 55 minutu eta 29 segundo behar izan zituen Urko Herranek. Ia hiru minutu gehiago behar izan zituen Aimar Otxoteko lesakarrak (1.58.11). Bi ordutik beheiti ibili ziren bakarrak izan ziren. Antzineko Ander Amezketak osatu zuen podiuma (2.01.04). Emakumeen artean, Gaikar taldeko Lola Oiarzabal izan zen bizkorrena.

Hodei Lujanbio garaile helmugaratzean, 15 kilometroko Ikatz lasterketa laburragoan.

15 kilometroko Ikatz lasterketa, berriz, Osin Trail taldeko Hodei Lujanbiok irabazi zuen, ordubete, 11 minutu eta 50 segundoko denborarekin. Ia hiru minutuko aldea atera zion Aritz Barberiari (1.14.37) eta hiru minutu baino gehiagokoa hirugarren izan zen Txurregi taldeko Aitor Perezi (1.14.59).

Zortzi kilometro eta erdiko Txiki Trail lasterketan, Hiru-Herri taldeko Atarratze Rota (37.15) etaLea La Blanca taldeko Nerea Calvo (45.31) nagusitu ziren.

Kirola Bortziriak Leitzaldea Lesaka Goizueta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun