Palestinari elkartasuna adierazteko, Israel Palestinan egiten ari den genozidioa salatzeko eta Euskal Herriko enpresek eta instituzioek Israelekin duten harreman komertzial oro eteteko eskatzeko helburuarekin, lanuzteak egin zituzten hainbertze langilek atzo. TTIPI-TTAPAk ere bat egin zuen deialdiarekin.
Mobilizazioak ere egin zituzten. Goizean, konparazio batera, Lesakako zaharren egoitzaren aitzinean, Alkaiagako industrialdean, Leitzako Sarrio lantegiaren aitzinean eta Elizondoko plazan elkarretaratzeak egin zituzten, baita Elizondoko zahar etxe atarian eta Lekarozko institutuko atean ere. Goizeko hitzorduak bukatutakoan, Iruñeko mobilizazioarekin bat egin zuten herritarrek.
Arratsaldeko mobilizazioak gehiago eta jendetsuagoak izan ziren. Areson, Elizondon, Donezteben, Lesakan, Arantzan eta Goizuetan, adibidez, elkarretaratzeak egin zituzten, horietako batzuetan kazuela jotzeak. Jendetza bildu zen; Lesakan, erraterako, 200 lagun inguru. Beran eta Leitzan, berriz, manifestazioak egin zituzten eta bietan jende aunitz bildu zen; Leitzan, adibidez, 500 bat lagun.