Pronostikoak betez, Iker Vicente izan zen onena larunbatean Lekunberriko kanporaketan eta, berekin batera, Ibai Soroa, Oier Kañamares, Txomin Amondarain eta Julen Kañamares ariko dira azaroaren 14an Doneztebeko finalean.
Bortz enbor moztu behar izan zituzten aizkolariek Lekunberriko kanporaketan: bi kanaerdiko, bi 60 ontzako eta oinbiko bat. Otsagabiko Iker Vicente, gaur egungo txapeldunak, 15 minutu eta 53 segundo aski izan zituen ana burutzeko. Arribeko Ibai Soroa izan zen bigarren (16.33), Arostegiko Oier Kañamares hirugarren (17.42), Arribeko Txomin Amundarain laugarren (18.30) eta Arostegiko Julen Kañamares bosgarren (19.25). Beraz, bortz aizkolari hauek lortu dute azaroaren 14an Donezteben jokatuko den finalerako txartela. Hamabi segundogatik, seigarren eta, beraz, finaletik kanpo gelditu zen Jon Rekondo leitzarra (19.37). Zazpigarren Xuban Kañamares izan zen (20.04), zortzigarren Eneko Saralegi (21.07) eta bederatzigarren Jon Erdozia (22.28). Azken bi sailkatuek, Saralegik eta Erdoziak, berez, maila galduko dute, baina Saralegik, hamabortz egunen buruan, Joxean Etxeberriaren kontrako kanporaketa jokatzea eskatzeko eskubidea dauka.
Aipatu bezala, lehen bortz sailkatuek jokatuko dute finala azaroaren 14an Doneztebeko Ezkurra pilotalekuan. Feria egunean 18:00etan hasiko den jaialdian, kanporaketako lan bikoitza izanen dute aizkolariek finalean, denera hamar enbor. Jaialdi berean, Euskal Herriko emakumezkoen arpana txapelketa ere jokatuko dute.