Larunbatean Zubirin jokatutako finalean 35-31 irabazi zieten Xanti Uterga doneztebarrari eta Agirrezabalari
Larunbateko jaialdiko lehen partidan, Jon Sagaseta iruritarrak eta Barricartek 30-27 irabazi zieten Koteto Ezkurra III.a eta David Mitxeo doneztebarrei. Finalaren aitzinetik Zubietako joaldunak eta emakumeek osatutako Goxo txaranga ibili ziren. Txapelketako bertze jaialdietan bezala, Erremonte Fundazioak Gazako genozidioa salatu zuen finalean ere.
Finalari dagokionez, aski berdindua izan zen. Hasieran Uterga eta Agirrezabala agintzen hasi ziren eta bortz tantoko aldea ere izan zuten (12-7 eta 13-8), baina Otxandorenak eta Otanok sei tanto segidan egin zituzten, 14-11 galtzen joatetik 14-17 irabazten joatera pasatzeko. Berriz ere hemeretzina eta hogeina berdindu ondotik, 23-20 aitzinetik paratu ziren gorriak. Baina berriz ere zazpi tanto segidan egin zituzten urdinek (23-27). Bi tantora hurbiltzea lortu zuten gorriek, baina ez zuten gehiago berdintzerik lortu. Belaunean kolpea ere hartu zuen azkenean Utergak. Azkenean, 31-35, Otxandorena eta Otano txapeldun.
