Pronostikoak beteta, Uterga eta Otxandorena aurrez aurre izanen dira Nafarroako erremonte txapelketako finalean

Ttipi-Ttapa 2025eko irailaren 29a

Ortziralean Lodosan segurtatu zuten finalerako txartela Utergak eta Agirrezabalak, Matxin III.ari eta Barricarti irabazita. Gazako genozidioa salatu zuten erremontistek.

Finalerdietako itzulerakoak ere irabazi zituzten eta Agirrezabalarekin eta Otanorekin batera izanen dira urriaren 4ko Zubiriko finalean.

Nafarroako erremonte profesionaleko hogeigarren txapelketako finalerdietako itzulerako partidak jokatu zituzten ortziralean Lodosan eta larunbatean Aiegin. Joaneko norgehiagoketan garaipen garbiak lortuak zituzten Xanti Uterga doneztebarrak eta Agirrezabalak eta Eloi Otxandorena doneztebarrak eta Otanok, eta itzulerako partidak ere irabazita, txapelketako bi bikote onenak izanen dira urriaren 4an Zubirin jokatuko den finalean.

Ortzirale arratsaldean Lodosako San Francisco Javier pilotalekuan jokatutako jaialdiko lehen partidako erremontista guztiak eskualdekoak izan ziren: Koteto Ezkurra III.a eta David Mitxeo doneztebarrek 30-21 irabazi zieten Jon Sagaseta iruritarrari eta Markel Leatxe donamariarrari. Gero, Nafarroako erremonte txapelketako finalerdietako itzulerakoan, Xanti Uterga doneztebarrak eta Agirrezabalak 35-31 irabazi zieten Matxin III.ari eta Barricarti. 23 tanto aski zuten gorriek finalerako sailkatzeko, baina, lehenbizikoa baino berdinduagoa izan arren (2-6 eta 7-12 irabazten izan ziren urdinak), bigarren partida ere irabazi zuten.

Finalerdiko itzulerako partida ere irabazi zieten Otxandorenak eta Otanok, Mikelarenari eta Ioni. Aiegin ere Gazako genozidioa salatu zuten.

Larunbat arratsaldean Aiegiko kiroldegian jokatutako jaialdiko lehen partidan, Koteto Ezkurra III.a doneztebarrak eta Agirrezabalak 20-28 irabazi zieten Jon Sagaseta iruritarrari eta Xuban Ilarregi oiztarrari. Ondotik, finalerdietako itzulerakoa jokatu zuten Eloi Otxandorena doneztebarrak eta Otanok, Mikel Mikelarena oiztarraren eta Ionen kontra. Joanekoan bezala, hasieratik bukaerara, nagusi izan ziren Otxandorena eta Otano eta 35-26 irabazi zuten, finalerako txartela eskuratuz.

Kirola Baztan Malerreka Irurita Donamaria Doneztebe Oiz

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun