Aurrelari leitzarra Mendizabalekin ariko da eta Sunbillako atzelariak Salsamendi izanen du lagun aitzineko koadroetan
Txapelketa irailaren 27an hasiko da Gasteizko Ogeta pilotaleku mitikoan, egun osoko pilota maratoi batekin. Bertan maila guztietako aurre-kanporaketak jokatuko dituzte eta aurrera egitea lortzen dutenek urriaren 5an izango dute hurrengo hitzordua, emakumeen esku pilotan hain berezia bilakatu den Bilboko Esperantza pilotalekuan. Finalak urriaren 12rako daude iragarriak, Donostiako Atano III.a historikoan, ETB-1eko kamerek zuzenean emango duten jaialdian.
Elite mailari dagokionean, aurten zortzi bikotek hartuko dute parte; Etxegarai-Gaminde, Arrizabalaga-Bergara, Zabaleta-Mendizabal, Arraiza-Capellan, Ibarrola-Betegi, Salsamendi-Bertiz, Aldai-Erasun eta Uriarte-Perez. Zabaleta-Mendizabal izan ziren iazko irabazleak eta aurten txapela defendatzeko aukera izango dute oso orekatua espero den txapelketa batean.