Zeberio II.ak eta Ionek asteburuan jokatutako bi partidak irabazi dituzte
Larunbatean Atarrabiako Paz de Ziganda ikastolako kiroldegian jokatu zen jaialdia. Nafarroa Oinez antolatzen ari da aurten Paz de Ziganda Ikastola eta pilota jaialdia ere horren barrenean dago. Zesta punta partida jokartu zuten lehenik eta erremonte txapelketako partidan, Zeberio II.a eta Ionek 35-20 irabazi zieten Eloy Otxandorena doneztebarrari eta Otanori.
Hasiera berdindua izan zuen partidak, baina hamalaunako berdinketaren ondotik, sei tanto egin zituzten gorriek (20-14). Hiru tantora hurbildu ziren urdinak (22-19), baina 11-0ko partziala erabakigarria izan zen (33-19). Azkenean 35-20 irabazi zieten Zeberio II.ak eta Ionek, partida bakar bat ere galdu gabe zeuden Otxandorenari eta Otanori. Honela, ligaxkako lidergoa ere galdu zuen bikote honek
Igandean Zangozako Cantolagua pilotalekuan jokatutako jaialdiko lehen partidan Koteto Ezkurra III.a doneztebarrak eta Xuban Ilarregi oiztarrak 30-24 irabazi zieten Osesi eta Markel Leatxe donamariarrari. Txapelketako partidan, Zeberio II.ak eta Ionek 35-17 irabazi zieten Xuban Iturregi iruritarraren ordez aritu zen Jon Sagaseta iruritarrari eta eta David Mitxeo doneztebarrari.
Argazkietan ageri denez, joan den astean bezala, Erremonte Fundazioak Gazako genozidioaren kontrako agerraldia egin zuen bi jaialdietan.
Finalerdietako lehen partidak asteburu honetan
Asteburuko emaitza hauekin erabakia gelditu da finalerdietako gurutzaketa. Honela, ligaxkan lider izan diren Xanti Uterga doneztebarrak eta Agirrezabalak, laugarren izan diren Matxin III.aren eta Barricarten kontra jokatuko dute eta bigarren izan diren Eloi Otxandorenak eta Otanok, hirugarren izan diren Zeberio II.aren eta Ionen kontra jokatuko dute berriz ere. Finalerdietako joaneko partidak Los Arcosen larunbatean (Otxandorena eta Otano, Zeberio II.a eta Ionen kontra) eta Irunberrin igandean (Uterga eta Agirrezabala, Matxin III.aren eta Barricarten kontra) jokatuko dituzte. Itzulerako partidak irailaren 26an Lodosan eta irailaren 27an Aiegin jokatuko dituzte, hurrenez hurren. Irabazleek finala urriaren 4an jokatuko dute urriaren 4an.