Ortziralean Artaxoan eta igandean Altsasun jokatutako jardunaldietan garaile suertatu dira Uterga eta Agirrezabala eta finalerdietarako txartela lortu dute.
Artaxoako txapelketako partidan, aipatu bezala, Utergak eta Agirrezabalak 35-23 irabazi zieten Zeberio II.ari eta Ioni. Markagailuak erakusten duena baino partida berdinduagoa izan zen, hogeinako berdinketara arte. Hortik aitzinera jaun eta jabe izan ziren urdinak eta partidako tanto alderik handiena azkenean izan zuten.
Jaialdiko lehen partidako lau protagonistak eskualdeko pilotariak izan ziren eta partida ezin berdinduagoa jokatu zuten: Xuban Iturregi iruritarrak eta Mikel Mikelarena oiztarrak 30-29 irabazi zieten Jon Sagaseta iruritarrari eta Markel Leatxe donamariarrari.
Altsasuko Burunda pilotalekuan jokatutako partidan ere 35-23 irabazi zieten Utergak eta Agirrezabalak Matxin III.ari eta Barricarti. Partida honetan, lehen tantoetan aitzinetik izan ziren Matxin III.a eta Barricart (0-3, 2-5), baina zazpina berdindu ondotik, lau tanto egin zuten Utergak eta Agirrezabalak (11-7) eta hortik aitzinera, aldea handitu eta partida erraz irabazi zuten.
Jaialdiko lehen partidan, Koteto Ezkurra III.a doneztebarrak eta Mikel Mikelarena oiztarrak 30-24 irabazi zieten Osesi eta Xuban Ilarregi oiztarrari.