Iazko finala errepikatuko da, protagonista berdinekin, baina plaza ezberdinean. Iaz Arraiozen izan zen finala, aurtengoan, aldiz, Donezteben izanen da. Iaz The Moment taldeak irabazi zuen eta bere laugarren txapela segidan irabazi nahi du. Oizko taldeak hiru txapel baditu, baina azkena 1990ean lortu zuen. Beraz, 35 urte eta gero laxoako lehen txapela lortzen saiatuko da laukotea.
Hirugarren postua jokoan larunbat goizean
Baina final handiaren aitzinetik, larunbatean 11:00etan hasita, hirugarren posturako partidua jokatuko duten Arraioz Sagardiaren eta Oiz Bren artean. Bi taldeak ligaxkan sailkapeneko buru izan ziren eta finalerako sailkapena lortu ez bazuten ere, seguru partidu eder bat eginen dutela hirugarren postuaren bila. Arraiozko taldeak jokatuko du gorriz eta taldea Mikel Mindegiak, Josu Etxandik, Urki Etxandik eta Aritz Alundak osatuko dute. Oiz B taldea Xuban Ilarregik, Mikel Mikelarenak, Zorion Zelaietak eta Markel Leatxek osatuko dute.
Egun osoko egitaraua eta bisita gidatua
Eguna, beraz, hirugarren posturako partiduarekin hasiko da. Partiduaren ondotik, triki poteoa izanen da eta gero, bazkaria Santamarian. Arratsaldean final handia jokatuko dute eta finala eta gero, luntx bat izanen da. Aipatu, norbaitek laxoarekiko azalpenak jaso nahi baditu, partiduan zehar jendea izanen dela azalpenak ematen, bisita gidatuan. Laxoaren hisrotiaz eta jokoaren inguruko azalpenak jaso nahi duenak 660 99 07 45 telefonoan eman behar du izena eta larunbatean 16:45ean izanen dute hitzordua Doneztebeko Bear Zana pilota plazan.