Zehazki, Zeberio II.a eta Ion, Xanti Uterga doneztebarra eta Agirrezabala, Matxin III.a eta Barricart, Eloy Otxandorena doneztebarra eta Otano eta Xuban Iturregi iruritarra eta David Mitxeo doneztebarra izanen dira txapelketa jokatuko duten bikoteak.
Final laurdenetako ligaxka abuztuaren 2an, larunbatean abiatuko da Sartagudan eta, ondotik, abuztuaren 11n Agoitzen, abuztuaren 15ean Hendaian (bi partida jokatuko dituzte Hendaiako erremonte profesionaleko mini torneoa goiburupean eta sarreran biltzen dena Iparraldeko Les deux Jumeaux elkartera bideratuko dute), abuztuaren 17an Santakaran, abuztuaren 23an Andosillan, irailaren 5ean Artaxoan, irailaren 7an Altsasun, irailaren 13an Atarrabiako Paz de Ziganda Ikastolan eta irailaren 14an Zangozan jokatuko dituzte partidak. Ligaxkako lau bikote onenek finalerdiak jokatuko dituzte, lehenbizikoak laugarrenaren kontra eta bigarrenak hirugarrenaren kontra, joanekoa eta itzulikoa: irailaren 20an Los Arcosen, irailaren 21ean Irunberrin, irailaren 26an Lodosan eta irailaren 27an Aiegin. Finalerdietako irabazleek finala urriaren 4an jokatuko dute Zubirin.
ADANOren alde
Txapelketako jaialdi guztiak ADANO elkartearen aldekoak izanen dira eta 10 euroko sarrera/dohaintza eginen dute 22 urtez goitiko ikusleek. 16 eta 22 urte artekoek bortz euro ordainduko dute eta hortik beheitikoak doan sartuko dira frontoira.