Doneztebe The Moment izanen da Oiz Aren arerio laxoa txapelketaren finalean

Doneztebarrek finalerdietako joanekoan etxean 7-9 galdu baldin bazuten ere Arraiozen 2-9 irabazi zioten Arraioz Sagardia taldeari itzulerakoan.

Baztan-Errekako 45. Laxoa txapelketako finalean, joan den urtean bezala, Doneztebe The Moment eta Oiz A taldeak izanen dira aurrez aurre. Oiztarrek aitzineko asteburuan lortu zuten finalerako txartela, herriko B taldearen kontrako lehia estuan (berdinketaren ondotik, hiru jokora jokatu behar izan zuten eta beteranoak nagusitu ziren). Bertze finalerdian, Arraioz Sagardia eta Doneztebe The Moment ziren aurrez aurre. Joan den asteburuan Bear-Zanan jokatutako partidan 7-9 irabazi zuten baztandarrek eta bazirudien etxean lor zezaketela finalerako txartela larunbat honetan, baina ez zen horrelakorik suertatu, urrunetik ere. Arraioztarrek lehen jokoa egin zuten (1-0), baina hurrengo zortziak segidan egin zituzten doneztebarrek (1-8). Bigarrena egitea lortu zuen Arraioz Sagardiak, baina 2-9 irabazi zuen Doneztebe The Moment, azken hiru urteetako txapeldunak.