Txapelketako pilotari onena izendatu duten Goiuri Zabaletak eta Itsaso Erasunek gauzak maldan gora izan dituzte Laia Salsamendi oso ausart bat eta Nora Mendizabal sendo bat 14-18 aurreratu eta finalak kolore urdina hartu zuenean, baina bukaeran buelta ematea lortu zuten.
Zabaleta eta Erasun ongi hasi ziren, 4-0 eta 5-1 aurreratu zien, batez ere arerioek egindako opariak aprobetxatuta. Salsamendi presaka antzean hasi zen eta zenbait akats egin zituen lesio larrietatik osatu eta jokatutako bigarren final handian. Hala ere, Izabako pilotariak erremateetan gehiago asmatu ahala, partida nabarmen aldatu zen. Uharteko klubean hazitako pilotaria sakearekin ere min egiten hasi zitzaion pilotalekuan bere lekua topatzea kosta zitzaion Erasuni eta urdinak lehen abantailak hartu zituzten, 8 tanto segidan eginda.
Une horretatik aurrera, publikoak bi aurrelarien erremateekin izugarri gozatu zuen. Salsamendi ausartago aritu zen airea bilatzeko orduan, bereak izan ziren tantorik txalotuenak, baina akats gehiago ere egin zituen. Goiuri Zabaletak, bere aldetik, nahiago izan zuen final praktikoagoa egin eta zuhurrago aritu zen.
Batez ere finalaren azken zatian, Leitzakoak eta Itsaso Erasunek aurkariek baino erabaki hobeak hartu zituzten, nahiz eta emaitza kontrakoa izan. Aurkariak pilotakada bat gehiago ematera behartzea erabaki zuten, askoz sendoago aritu ziren eta Labriteko ikusle ugari eta emanak asebete dituen partida irauli zuten, txapela janzteko (22-19).
Jaialdiko lehen partidan, Etxegaraik eta Nahia Bertiz sunbildarrak 11-18 galdu zuten Ibarrolaren eta Osesen kontra.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!