Bina haur Erratzura, Elizondora eta Iturenera etorriko dira, eta gainerakoak Iruritara, Zigara, Narbartera, Donamariara eta Sunbillara eta abuztuaren 29ra arte eskualdean pasatzekoa dute uda.
Urte osoan auzolanean
2007an sortu zuten Saharaztan elkartea, aitzinetik Baztan-Bidasoko eta Leitzako hainbat herritar Sahararen alde lanean aritu ondotik. Geroztik Oporrak Bakean programa izan da elkartearen proiekturik nagusiena. Baina ez bakarra, urte osoan aritzen baitira Sahararen alde auzolanean. Hala, urtero Tindufeko errefuxiatuen kanpamentuetan laguntzen aritzen den elkarte bat diruz laguntzen dute.
Joan den urtean, adibidez, ANAS Sahararen Lagunen Nafarroako Elkartera bideratu zuten dirulaguntza, udazkenean izandako uholdeek eragindako kalteak konpontzen laguntzeko. Aitzineko urtean, Saharako Kabiak elkarteari eman zioten dirulaguntza, errefuxiatuen eremuetako liburutegi zerbitzua osatzen eta mantentzen segitzeko. Ur deposituak ere erosi izan dizkiete, baita produktu bilketak egin ere, eta elkarretaratzeak eta sentsibilizazio ekintzak ere egiten dituzte. Elizondoko ferietan egiten duten tonbola izaten dute diru iturri nagusia. Gainerakoan, familia bakoitzak harrera egin dion haurrarekin eta haien familiarekin urte osoan mantentzen du harremana.
Oporrak Bakean programa
Bertzalde, urteotan harrera familien kopuruak beheiti egin du. Pandemiaren aitzinetik, . Oporrak Bakean programarekin urtero hogei bat haur etortzen ziren Baztango, Malerrekako eta Bortzirietako familietara. Bi urtez, taldean harrera eginez, Bakeleku udalekuak ere antolatu zituzten Elizondoko Lanbide Eskolan.
Pandemia tarteko, ordea, alde batera gelditu zen programa, eta bi urteko geldialdiaren ondotik, 2022ko udan berrartu zuten Oporrak Bakean. Geroztik, poliki-poliki ari dira: Hiru haurrekin hasi ziren eta aurten hamaika dira.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!