Lehen finalerdi horretan agintzen hasi zen Doneztebeko bikotea (0-6, 1-7, 4-10), baina hamarna berdindu ondotik, berdintasun handiko zatia izan zen. Bigarren zatian, berriz, Zeberio II.a eta Barricartek sei tantoko aldea hartu zuten (29-23, 30-24), baita zortzi tantokoa ere (33-25). 34-27koarekin, dena erabakia zirudienean, sei tanto segidan egin zituzten Utergak eta Mitxeok (34-33), baina ez zen aski izan finalerako txartela eskuratzeko.
Azkoiengo jaialdiko lehen partidan Xuban Iturregi iruritarrak eta Baztanek 30-20 irabazi zieten Osesi eta Agirrezabalari.
Bertze finalerdia ere estua
Burlatako finalerdia ere aski estua izan zen, baina azkenean, Eloy Otxandorenak eta Otanok 35-31 irabazi zieten Matxin III.ari eta Agirrezabalari. Ligaxkan baino lan gehiago egin behar izan zuten irabazleek, orduan 35-23 irabazi baitzuten. Hasieran aitzinetik izan ziren Otxandorena eta Otano (4-7), baina zortzina berdindu ondotik, Azpeitiko bikotea gailentzen hasi ziren: hogeita bina berdindu ondotik, 29-23 eta 31-27 aitzinetik izan ziren Matxin III.a eta Agirrezabala, baina azken txanpara freskoago ailegatu ziren Otxandorena eta Otano eta azken zortzi tantoak segidan egin zituzten, 31-35 irabazteko.
Burlatako lehen partidan, Xanti Utergak eta Barricarten ordez aritu zen Doneztebeko erremonte eskolako Ilarregik 30-21 irabazi zieten Zeberio II.ari eta Baztani.