Hiru txirrindulari hauek hasieratik ihes egin zuten elkarrekin eta bosgarren itzulian, Bertizen eraso bortitz batek metro batzuk gibeleratu zituen Sagardoy. Losarcosek eutsi zuen eta Bertizen neke hori aprobetxatu zuen, garaipena lortzeko. Halere, Bertizek bigarren postua aski zuen maillot horia janzteko. «Karrera hagitz gogorra izan da. Aitzineko proban, Nafarroako txapelketan Iñigok [Sagardoy] irabazi zuen eta zalantzak nituen, baina banekien Zangozako zirkuitua ere niretzat egokia zela, igoera esplosiboekin. Lehen lau itzulietan bere gibelean joan naiz, nola zebilen ikusiz, bosgarrenean nire burua ongi ikusi dut eta erasoa jo dut, Adrianekin [Los Arcos] batera. Azken itzulian gibelean utzi nau, baina hagitz kontent akitu dut, bai nire maillotagatik, baita Adrianen garaipenagatik ere, laguna dut eta merezi du».
Kategoria nagusian ez ezik, 23 urtez azpikoen kategorian ere lehen postua lortu zuen Eneit Bertizek. Bigarren postuan Saltoki Conor UCI taldeko Jon Egizabal leitzarra gelditu zen. Santiago Iriartek (Lacunza Construcciones) osatu zuen podiuma.
Junior kategorian, berriz, Gazteluko Mikel Telletxeak (Saltoki Conor) maillot horia lortu zuen Zangozan bigarren izan ondotik, eta bere taldekideak, Unai Iñarrea igantziarrak, hirugarren postua lortu zuen lasterketan eta bigarren postuan sailkapen orokorrean. Oraingo honetan, Iruritako Oihan Alemanek (Saltoki Conor), ezin izan zuen Zangozako lasterketan parte hartu, Lons Le Saunie hirian (Frantzia) jokatutako Frantziako Kopan UCI Junior Serieseko proban ehiatzen ari zelako.
Kadeteen kategorian, azkenik, Aurrera taldeko Aratz Gurrutxagak lasterketa bikaina egin zuen, txapelketa irabazi eta maillot horia janztera eraman zuena.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!