Erremontari Herriz Herri txapelketako lehen jardunaldia Idiazabalen jokatu zen ortziralean. Partida nagusian, Aimar Jabalerak eta Barrenetxea IV.ak 2-0 irabazi zieten Josetxo Ezkurra II.ari eta Larrañagari (15-5 eta 15-8). Bertze partidan, Irazuk eta Oier Apezetxea goizuetarrak 2-1 irabazi zieten Susperregi eta Martirenari (15-14, 8-15 eta 8-2).
Zestoan larunbatean jokatutako bigarren jardunaldian, berriz, Aldabek eta Larrañagak 2-0 irabazi zieten Segurolari eta Aritz Juanenea saldiastarrari (15-9 eta 15-6). Lehen partidan, Gurrutxagak eta Eskuderok 2-1 irabazi zieten Goikoetxea VI.ari eta Goikoetxea V.ari.
Sagardoaren Txapelketa gaur Galarretan
Euskal Telebistako Erremontari saioaren barrenean, Sagardoaren Txapelketako bigarren jardunaldia jokatuko dute gaur Galarretan. Astelehenean 18:00etan hasiko den jaialdiko lehen partidan, Urriza eta Larrañaga (Petritegi), Aldaberen eta Barrenetxea IV.aren kontra (Oialume Zar) ariko dira. Bigarren partidan eskualdeko hiru erremontista ariko dira. Ansa II.a eta Aritz Zubiri goizuetarra (Aburuza), Josetxo Ezkurra doneztebarraren eta Aritz Juanenea saldiastarraren (Bereziartua) kontra. Bi partidak 22:20etik aitzinera emanen dituzte Euskal Telebistan.