Iruñeko Alde Zaharreko erremonte txapelketaren hamaikagarren edizioko finalak jokatuko dituzte apirilaren 4an, ortziralean 19:00etan hasita, Iruñeko Labrit pilotalekuan. Maila nagusikoan, jaialdiko bigarren partidan, Xanti Uterga doneztebarra eta Barricart, Matxin III.aren eta Ionen kontra ariko dira.
Aitzinetik, jaialdiko lehen partidan jokatuko duten promozio mailako finaleko lau erremontistak eskualdekoak izanen dira: Xuban Iturregi iruritarra eta Mikel Mikelarena oiztarra ariko dira Jon Sagaseta iruritarraren eta Markel Leatxe donamariarraren kontra.
Txapelketako jaialdi guztiak bezala, finaletako jaialdia ere, sarrerako dirua ADANOra, minbizia duten Nafarroako haurren eta senideen elkartera, bideratuko dute. Sarrerako dohaintza hamar eurokoa izanen da 22 urtez goitikoentzat, bortz eurokoa 16 eta 22 urte bitartekoentzat eta 16 urtez beheitikoak doan sartuko dira.