Igande honetan erabakiko dute Nafarroako Kirol Jokoetako finala nork jokatuko duten

Kimuen maila

Proba konbinatuak

Kimuen kategorian, eskualdekoen artean, Arantza, Basaburuko bi talde (A eta B) eta Igantzikoak ari dira. Igandeko jardunaldian, Arantza bigarren gelditu zen; Basaburua B laugarren, Basaburua A zazpigarren eta Igantzi bederatzigarren.

Lau jardunaldietan denborarik hoberena lortzen duten lau taldeek finalerako txartela lortuko dute, eta lehia estua da. Orain arteko emaitzak kontuan hartuta, Andra Mari 3k, Basaburua Bk, Andra Mari 2k eta Arantzak lortuko lukete finalera pasatzea, baina segundo batzuetako aldea bakarrik dago taldeen artean, eta igandeko saioan dena aldatzen ahal da.

Haurren maila

Proba konbinatuak

Eskualdekoen artean, kategoria honetan, hiru talde dira eskualdekoak: Basaburua, Igantzi eta Berako Labiaga Ikastolako kideek eta Arantzako haurrek osatutako Labirantza. Sailkapen orokorrean, igandeko saioan, aitzinekoan bezala, Igantzi nagusitu zen; bigarren, hau ere, aitzinekoan bezala, Basaburua gelditu zen, eta Labirantza borzgarren.

Kategoria honetan ere, lau jardunaldietan denborarik hoberena lortzen duten lau taldeek finalerako txartela lortuko dute. Orain arteko denborak kontuan hartuta, Igantzi, Basaburua, Iñigo Aritza eta Antsoain B taldeek lortuko lukete finalerako txartela. Baina igandeko laugarren eta azken jardunaldian zer gertatzen den ikusi beharko da.

Sokatira

Sokatiran, eskualdekoen artean, Basaburukoak bakarrik ari dira. Bi jardunaldi eta finala eginen dituzte eta hala, lehenbiziko jardunaldia martxoaren 16ko eta 23ko saioen ondotik erabaki zen. Bigarren jardunaldiko sailkapena igande honetan zehaztuko da eta finalean sei talde hoberenek parte hartuko dute.

Kadeteen maila

Proba konbinatuak

TTIPI-TTAPAren eremuari erreparatuz gero, Basaburukoak bakarrik ari dira kadeteen mailan, eta igandeko hirugarren jardunaldian bigarren gelditu ziren. Baina orain arteko hiru jardunaldietako denborak kontuan hartuta lehenbiziko postuan da Basaburua, eta berarekin batera, Araxes, Andra Mari eta Antsoain A pasatuko lirateke finalera. Dena den, igandeko jardunaldiko emaitzak ikusi beharko dira finala nork jokatuko duten baieztatzeko.

Sokatira

Sokatiran, kadeteetan ere, eskualdekoen artean, Basaburukoak bakarrik ari dira. Bi jardunaldi eta finala eginen dituzte eta lehenbiziko jardunaldia, adibidez, martxoaren 16ko eta 23ko saioen ondotik erabaki zen. Bigarren jardunaldia, berriz, igande honetan zehaztuko da eta finalean sei talde hoberenek parte hartuko dute.